سأعبدك ربى كما لم اعبدك من قبل

السلام عليكم ورحمة الله ردوا السلام انا جايه انهارده اقول ان رمضان قرب عارفه انكم عارفين بس حبيت افكركم ان رمضان ده عاوزين نرفع شعار سأعبدك ربى كما لم اعبدك من قبل وعاوزين بجد رمضان السنه دى ان شاء الله غير اى رمضان ونستعد كلنا فى عباده يبلغنا الله بيها رمضان ان شاء الله وربنا ييسر ونعرف نرتب مع بعض جدول من خلال المدونه نمشى عليه اه نسيت وبرده هنفضل نتكلم ونقول الحق يعنى مش معنى ان رمضان جه نكسل ندخل على المدونه دى نوع من انواع قول الحق والتعبير عن عدم الرضا عن الظلم المهم يكون فيه تنظيم فى وقتنا وربنا يجعل رمضان السنه دى عليكم تكونوا الى الله اقرب وعلى طاعته ادوم واستحلفكم ما تنسوش تدعولى وياريت لو اى شخص عنده اقتراح يبعتلى فى اى تعليق واوعوا تنسونى من الدعاء اه زى ما هدعيلكم تدعولىويا شباب عاوزين همه والمساجد تكون عمرانه بالدعاء والصلاه بجد نفسى كشباب نحقق حاجه ومش شباب بس كل المسلمين لان رمضان ليه طعم غير اى شهر تانى ربنا يطعمكم من الطاعه وياريت لما تيجوا تفطروا ما تكلوش كتير عشان تصلوا التراويح انا عارفه الحركات دى ناكل ونام ومنقدرش نصلى ولا نتابع كل القنواتاللى فيها مسلسلات جديده حاجه غريبه صحيح ربنا يكرمكم يارب

الطفل ده اتعذب واتكهرب يا سيادة الريس فين حقوق الطفل

الطفل ده اتعذب واتكهرب واتعملوا عمليات ومن التعذيب فتحوله جمبه والدته بتقول ابنى كان رايح القسم زى الحصان هقولها البقاء لله يا والدتى بس ده ذنبه ايه احنا قولنا يا ريس ان احنا نوريلك الظلم ان احنا بنتكلم بصوت عالى شويه لو سمحت اسمعنا احنا بنتبهدل كتير بعد اذنك خد لينا حق الطفل ده والادله ما بين ايدك اعتبره ياريس طفل بيقولك عاوز حقى يا ولى امرى

بالله عليكم الجسم ده والوجه ده شكله يعرف يعمل حاجه شكله يستاهل يتعذب ده ولا بيحتج ولا بيعارض ده لسه بيفكر يتعلم لسه بيقول الف باء هبدء حياتى بدئها يا حبيب العدل على ايد منظمتك ونهاها برده على ايدكم بأسؤ اسلوب انتم ولا قتلتوه ولا دبحتوه ده انتم قطعتوه حتت ورميتوه ليه يحصل كده فى بلادنا ليه نكون سلبيين ليه مش عاوزين تسمعونا

الطفل ده مسئول عنه كل ظالم من اول القسم اللى خرج منه ميت مش قادر يتحرك لحد المستشفى اللى رميته فى الطريق وبتقول اصله كان بيقطع فى المراتب مراتب ايه ارحمونا هوه ده شكل واحد بيتحرك هوه ده قادر يقول اه بلاش بقى فبركه ياريس يا حبيب العدل عاوزين حق الطفل ده هوه احنا عاملين اتفاقيه ننقص من عدد الشعب عشان هنعمل حسابنا للتزايد السكانى لو الموت مصيرنا احنا عاوزين نموت بكرامتنا عشان البلد دى بتاعتنا بنحبها مهما حصل واحنا مش قليلين عشان نحرك العلم بأكمله يحكم بالعدل

بالله عليكم هى مش مجموعة صور مؤثره وبس لاء دى صور بتصرخ وبتتكلم لو انت هتفضل سلبى

عاوزين حقوق الطفل ياللى كل يوم بنفتح التلفزيون وتقولوا مهتمين بدراسة والمواد الترفيهيه والتعليميه وثقافة الطفل المصرى ده الترفيه اللى بتنادوا بيه ربنا يبارك لكم احنا مش عاوزين نتخدر لان بقى عندنا مناعه ضد الكلام الحلو

اوعى اجرى البلديه جايه

فى كل اسواق مصر فى باعه جائلين ناس بسيطه ولا عاوزه تسرق ولا تزور ولا اى حاجه غير انها تعيش مستوره تعالوا نشوف دول عقا بهم فى مصر ايه جت البلديه فى يوم يا عينى كل العربيات بتجرى بتاع النعناع وبتاع الطماطم وعربيه كارو فيها خيار جت البلديه ومسكت الولد صاحب العربيه الكارو ونزل من عربية البلديه اتنين ولا بيخا فوا ربنا ولا بيخافوا حد وشا يفين نفسهم اوى شيل ياد الخيار اللى على العربيه يا باشا معلش اخر مره طبعا دول بيتكلموا مع بتاع الخيار غير اللى عمالين ياخدوا رشاوى فى الشارع التانى غير اللى بيضربوا بتوع الخضار المهم بتاع الخيار يا باشا معلش اخر مره وهما يلا يواد لم شيل الخيار من العربيه لنقلبلك العربيه فى الشارع حاضر يا باشا طبعا والواد مش عارف ينزل حاجته فين يرميهم فى الشارع ولا يعمل ايه وال ايه الاتنين اللى شايفين نفسهم ان شاء الله فى نارجنهم ماسكين العربيه ويقلبوا العربيه بنعمة ربنا فى الارض طبعا الولد اتنرفز زعق بيقول حرام ازاى بقى يقول كده نزل خمسه عليه تبع البلديه ضرب وتلطيش وحياة امك هنوريك وبالشلاليت والبونيات الواد فضل ينزف وهما يضربوا وراحوا مركبينه العربيه وراحوا شا يلين العربيه الكارو طبعا كل اللى فى الشارع معترض وبيدعوا عليهم ربنا ياخدهم امين بس لفت نظرى حاجه ان اللى بيشيل العربيه الكارو مش بتوع البلديه بس فى وسطيهم واحد لا بس جلبيه قصيره ومربى دقنه والراجل ده عامل فيها شيخ طيب ازاى تقبل الظلم وازاى تساعدهم لاء وبيساعد الناس بقلب اوى ربنا يوقف قلبه المهم عرفت ان الراجل ده ولا شيخ ولا حاجه وانه مخبر ميهمناش المهم دلوقتى الشباب اللى عاوزه تاكل لقمة عيش بالحلال اضربت واتهانت والمدمنين والشمامين وبتوع المخدرات والسوابق مليين الشوارع طيب واحد زى اللى مسكوه ده يقول ولا هعيش بالحلال ويطلع من عندهم يبلطج على الناس او يدفع رشوى انا بقى نفسى اعرف مين يقدر يشيل الارف اللى بيجى فى الحكومات ده اللى بنقول نصلح الشباب ولا ظابط بنجمتين يبوظ الشباب عشان فلوس ياخدها مش عارفه ناقص ايه يدمرونا بيه المفتريين دول حسبنا الله ونعم الوكيل

اللى بيخاف هوه اللى عاوز يخاف

مش عارفه هخاف من ايه وليه لازم نخاف عشان نعيش واعيش ازاى وانا مش عارفه اتنفس يبقى هعيش ليه ويوم لما اخاف هخاف من مين من امن الدوله ولا الرئيس ولا هخاف على ايه طيب ما كل شئ لله مش جدعنه ولا شطاره ولا غويين اذى عشان اوعى متكتبيش حسبى متشتركيش اوعى تتكلمى لازم تسكتى اصل وفصل وناس غلبانه ولا كأننا بنسمع امنا الغوله ويوم ما اعيش هعيش من غير كرامه وخايف وجبان ولا اعيش انسان متكرم مش مهان اصل المسئله ببساطه عاوزين يقفلوا بوقى بسداده وانا هفضل اقولها بكل الاطه مش انت اللى هتخوفنى ده الخوف من رب العباد طيب انت مش خايف من التعذيب؟ ايمانى بالله اقوى من اى شئ مش مستنى كلمة عطف وحنيه او كلمه تدافع وتقلل من الهمه لان كله لله ومن ترك شيئا لله عوضه الله خيرا منه واحنا هنفضل نقول لاء ونعترض ونتكلم لحد لما ميزان العدل يعدل وميزان الظلم يدمر انابسئل نفسى ليه لو بدعى واكلم حد فى شئ صح اوطى صوتى وكأنى بسرق ولما اغنى واهييس واعبط فى كل شئ صوتى يعلى ويجلجل اصل المسئله ببساطه مش هكون جبان لنجمه وعلامه وبدله بيضاء وقيود وراء قضبان عشان لسه لحد دلوقتى الواحد بيعانى من سياسة الجبن والخوف ووجوده وراء ستاره كلها اكاذيب ومفيش ضمير يألم صحبه ويقوله ارحم نفسك وهقول وهيعلى صوتى مش مستنيه حد يقولى اسكتى او اعملى مش هنسكت ومش هنسيب ومش هندمر الا الظلم كلامى على لسان اخت واخ وهنفضل نقول الله اكبر على الظالمين وحسبنا الله ونعم الوكيل

فضفضة قلبى قلمى يبكى ويضحك

بيصعب عليا نفسى وانا موجوده لوحدى افضل افكر هوه احنا ليه كده ما احنا مش بنتكلم ونعمل بروباجندا ولا بنكتب تنفيس عن غضب هيفرقع بداخلنا قلوبنا بنكتب عشان حاملين هم قضيه ساعات قلمى اكلمه واقوله اكتب والله هتصدقونى انى بحس انه بيبكى هفضل اكلمه واقول ليه انت اللى باقى ليه ده انت صرختى فى غضبى وضحكتى فى فرحى نفسى اعمل حاجات كتير وبخاف على حاجات كتير مش مهم تكون بتاعتى بخاف على قلب غيرى يتكسر وبخاف على قلم غير يخلص حبره عشان كده باخد قلم احتياطى فى الامتحان لاء انا بتكلم جد ساعات بناجى ربنا وقوله ثبتنى وساعات بحس انى عاوزه اقول لكل واحده من اخواتى انى بحبكم فى الله سا عتها بفتح النت وبلغ خطابى لاحبابى وساعات ببقى بحس بناس وخايفه عليهم واخاف على خوفهم انى مكونش حاسه بقربهم وساعات ببكى على لحظة غضب لغير الله ولحظة ندم لشئ مش باقى ولحظة جرح لما اكون بكيت بدموع على حد ميستاهلش بس اعتقد انى دموعى بتبقى خوف من يوم هيتظلموا فيه زى ما ظلمونى صباح الخير يا بلدى وانا صغيره كنت بحب برنامج العلم والايمان ويجى مصطفى محمود يتكلم وابقى مستمتعه جدا حتى لو مش فاهمه وكنت بتخنق من صباح الخير يا مصر وانا رايحه المدرسه ولكن اجمل ايامى وانا فى المدرسه الواحد مكبرش اوى بس حاسس ان المسئوليه كبرت وبشيل هم كل واحد مطنش او منفض زى ما بنقول للحياه وماشى فى طريق واحد مش عارف نهاية لينحرف ليعبد ربنا من غير نهضه والبلد مش مساعده وحاجات كتير واهانة ظباط لمدنيين واكل اموال الناس والرشاوى وحاجات كتيربس برده من ضمن كلامى امى دى بقى احن شخصيه فى حياتى فى كلامها فى ابتسامتها ويوم لما تضحك من موقف يكون بسببى بطير من الفرحه وطيبة قلبها وخوفها وسؤالها وحكمتها وكرامها وافعالها وفى كل حاجه وده خلانى بحب اى ام مسلمه اول ما اسمع كلمة ام بتذكر امى فورا واحن ليها وماما بتضايق جدا لو قبلنا رجليها بتضايق بالرغم من ان انا شيفاها عادى وان احنا مش هنيجى ربع فى المائه من تعامل الصحابه لامهاتهم وان انا مازلت اكرر لست ملاكا وانى 100 على 100 فى طاعة الوالدين اكيد لينا اخطاء بحب ماما جدا ربنا يبلغنى رضاها وبحب الصحبه اللى انا موجوده معاها والتألف اللى ما بينا والاناشيد اللى بننشدها والكلام عن ربنا صلاة الجماعه ولما نقول انى احبك فى الله بجد حياه تانيه وده اللى مهون عليه انى لسه فى خير وبنات وشباب عاقلين وان لسه البلد دى جواها قلوب عامره بذكر الله انا عارفه دوشة اللى هيقرء التدوينه دى بالرغم ان عندى كلام كتير بس كفايه كده واقبلوا منى فضفضتى واللى مش هيقبلها مليش دعوه هيقبلها وهدعيلوا دعوه لله اى خدمه محدش يتكسف اقرء وعادى يعنى متتكسفوش اطلبوا شاى قهوه موجودين بس لازم تقروا التدوينه

هو وهى مش هنعنس

انا بتكلم ومش عارفه احنا عندنا ثقافه معينه ولا احنا لينا اسلوب حياه معين انا هتكلم عن حاجه شفتها وسمعتها بدل

المره مليون ايه يا بنتى انتى قطر الجواز فاتك ازيك يا حبيبتى مش هتتخطبى بقى عامله ايه يا اموره انتى اهوه على وش جواز ماشاء الله بنتك كبرت وبقيت عروسه مفيش حد اتقدملها وكلها جمل بتغيظنى دع المخلوق للخالق اللى لسه متخطبتش دى هتقول لائى شخص ماشى تعالى اخطبنى واللى بيقولوا عليها فاتها قطر الجواز مطلوب منها ايه تقطع تذكرة ذهاب وعوده فى المترو وتلحق بقطر الرجال نفسى نفهم ان ده نصيب ونفسى اقول الكلام ده لكل ام يا ام حماده ويا ام محمد ويا ام شادى ويا ام عتريس ده نصيب ولو اتخطبت هاه عملتى ايه مع خطيبك كويسه طيب احكيلى وطبعا تضطر البنت تبص للى اتخطبت يا جماعه سيبوا البنات لهدف تانى طيب دى من اول ما تشم نفاسها وتقول انا كبرت وليه شخصيه يلا جالها عريس يلا هتتجوز طيب انا مقدره ان الولد والبنت هيتجوزوا لكن بلاش سياسة القمع دى على البنت وكأنها هى اللى فى ايدها تتخطب وتتطلق وتتجوز وفى ايديها تمشى كل حاجه المفروض يكون عندنا اهداف تانيه بجانب برج الجواز فيه الدعوه الدراسه اسلامنا مشاكل الدنيا ما هى البنت مهما قعدت مش هتخلل ولا هتحمض ولا هتنقص لاء هتفضل بنت وعشان مأكونش متحيزه سيبوا الاولاد يشوفوا حياتهم زى ما هما عايزين بلاش سياسة خالتى وخالتك والبنت للولد من ضغرهم يا با الحج بتعه لعويس يا شباب احنا مش هنحجز بلاص مش ده بيت اسلامى وتألف قلبين فى طاعة الله وضغط الاهالى ان الشاب يتجوز واحده معينه مع احترامى ليهم ولرغبتهم وان البنت تتزوج واحد معين من جائكم من ترضونه دينه وخلقه فزوجوه مش لازم العربيه والشبكه ب15 الف والشقه 7 غرف كأنها هتعمل فريق كوره اساسا ماشاء الله الشباب مش عارفين يتجوزوا كمان نعقدها ده ايه المكوك الفضائى اللى بنضربه فى كل شاب ولو البنت اهلها موافقين بالقليل تأتى المشاكل اصل اهلك بعوكى بالرخيص ده انتوا مطلبتوش حاجه طيب يا جدتى دول ريحوا قلب ابنك وهى مش سلعه للى يدفع اكتر وابنك المشترى ارجوكواااا سيبوا الشباب يختار بنت او ولد ونا قشوا المواضيع وشوفوا مناسب ولا لاء بعد الاستخاره ومعرفة اخلاق الطرفين لكن بلاش سياسة الدوله اللى احنا عايشين فيها وهقول تانى ولا فى بنت بتعنس ولا ولد بيعنس والبقيه تأتى من سلسلة العنوسه ورفض حجاب او غيره للزواج

يا بختك يا مصرى مبروك المرض

ببارك وأهنى والف مبروك على كل مصرى لان احنا طلعنا الاوائل فى التلوث فى العالم يعنى اهوه اول مره نغلب الدول الاروبيه والمتقدمه ومن بعض الاراء اللى سمعتها المهم ان احنا طلعنا الاوائل فى حاجه وخلاص شهاده يا سيادة الريس من بلاد العالم ان مصر حصلت على المرتبه الاولى فى التلوث العالمى يا بختنا مين قدنا يلا يا شعب مصر انزل وانتعش واسحب كمية هواء لا بئس بيها يجيلك الربو وامراض الكوليرا واترمى فى اى مستشفى وتموت وتتسرق اعضائك ونقولك الف مبروك انت معنا فى مسابقة امراض مصريه ناقص ايه تانى عشان يحصل لينا انهى حياه نبقى عليها ونحافظ عليها ونبشر كل من يعيش على ارض مصر سوف يغزو مصر تقدم هائل فى امراض جديد ه ال ايه البلد بتتقدم وال ايه كمان كل بلد وفيها عيوب كل البلد فيها عيوب وكل حكومه فيها بلاوى الا مصر الامصر مفيهاش عيوب وحكومتها تمام عقبال ما تدفنونا واحد واحد وعلى ايه تدفنونا سيبونا نموت واوعوا تجهدوا نفسكم وتدفنونا بشوية تراب عمار يا مصر عشان ما نعلى ونعلى لازم نطاطى نطاطى نطاطى اطاطى اكتر من كده ايه ظهرى اتكسر يا ريس

عماد الكبير وقضية اعدام كرامه

صرخات ودموع رجل

مش عارفه اقول ايه غير ارحمونا زهقنا ده ولا دين ولا اخلاق ولا تربيه تحم باللى بتعملوه فى خلق الله يا با شا اسلام بيه كفايا بقى وكفايا بنقولها لكل اللى بيعمل زيك والله حرام هوه ظام فى المعيشه وظلم فى الهواء وفى المايه كمان مش عارفين نشرب مايه نضفه وارتضينا كمان مش موجوده المايه اللى مش نضيفه كمان كرامة رجلتنا بتقتلوها والله ده الحيوان فى اى بلد تانى بيتعامل برحمه مبنطلبش حقوق الانسا ولا حقوق الحيوان عملونا على اساس ان ربنا خالق بشر بتتألم وبتصرخ ده ايام الجاهليه مكنوش بيعذبوا الناس التعذيب الدنئ ده الواحد دلوقتى بيقول زهق بكره مش عارف يعمل ايه وبرده البلد دى هتنضف ان شاء الله من كل الميكروبات اللى بتسيطر عليها كفايا الفلونزا الفراخ بلاش الفلونزا الحكومه

حرامى بيضرب حرامى عشان سرق

طبعا حسب خبرتى المستفزه ومن الكاميره الديجيتال اللى مش موجوده عندى اصلا وانا صاحيه من النوم سمعت حد بيزعق طبعا كان لازم الواحد ينزل بنفسه يحل المشاكل دى المهم لقيتهم بيقولوا حرامى حرامى راح الناس مسكاه ضربينه وطلع الواد اللى مسكوه مش الحرامى ده عيل صغير مش فاهم حاجه كان معاهم والحراميه الكبار جريوا جه بقى واحد اساسا مقبوض عليه بالسرقه 5000 الاف مره مسك الواد الصغير ونزل ضرب فيه وراح مفتشه واخد منه الموبايل ومشى طلع بيثبت اللى واقفين عشان يا خد الموبايل جت بقى واحده زى ام حماده حرام عليكوا ده عيل صغير اهو انتوا ما تقدروش غير على الغلبان اصلكم واصلكم وكل ده وبيضرب فى العيل الصغير ناس من الحجم الكومبو والعيل كله 150سم ولا حاجه المهم اخد جزائه جت عربية الاتارى وراحت رمياه فوره فى شنطة العربيه يعنى يوصل مخنوق ان شاء الله اصل احنا بنهتم بحقوق الانسان

بنت وولد فى الجامعه مش مقتنعه

قصه مش جديده وحكايه مش غريبه الولد يتعرف على البنت طبعا عاوز يخرج ويدخل ويتكلم ويتصل بليل الخ الخ الخ والبنت حبيت الولد والولد حب البنت طبعاده كله كلام فاضى اللى عاوز حد بيدخل من الباب وتأتى القصه كالتالى تعرفى يا شهيره ان محسن بيحبنى جدا لاء وبيخاف عليه موت واحنا خرجين من ورابابا وماما اتخانق معايا عشان بضحك بصوت عالى لاء وايه وعدنى 2مليون مره هيجى البيت اسكتى محسن ده حكايه طيب وبيحبنى وهى بتاكل رز بلبن وبتقنع نفسها بعد 3 شهور شفتى يا شهيره محسن راح يتكلم مع سعاد ويخرج معاها واكلمه يقولى موعدتكيش بحاجه يا بنتى مش انتى بتقولى طيب وكويس وراجل وابن حلال انا قولت كده ده انا كنت بسكت نفسى هوه ده راجل هوه ده يعرف حاجه ده اكلنى لحم ورمانى عظم وحبت كبده ده ميناسيبنيش اساسا يا نهار ابيض هوه انا معقول ارضى لنفسى الواد ده ده انا جايلى سيد سيده وتبدء قصه اخرى بنفس النظام 24 قدم اللى عاوزه اقوله ان البنت حياء وكرامه وعفه واخلاق بعيد عن انى مش مقتنعه بطريقه سعاد ومدحت اوعوا تقولوا مين اكيد برده قصه تانيه بس الحب قبل ان يكون مشاعر فهو اخلاق مش معنى ان ميكونش فيه نصيب يبقى نذكر الاخرين بأسؤ مافيم لازم نعرف اللى كان موجود فى يوم من الايام كان سر لشخصين وعموما معروف لو سعاد عرفت مدحت بنفس طريقة محسن وبتعه اكيد مش هيكون فى اخلاق لانها محاولتش تحافظ على حيائها وعفتها وكرامتها فمتنتظرش انها تحافظ على السر وبدعى من قلبى ربنا يعف شباب وبنات المسلمين

السياسه جوه كوباية الشاى طب ازاى!!!!!!

مش عارف كل اما اعمل حاجه يقولولى ابعد عن السياسه خوفونى وجننونى طيروا النوم من عيونى قعدت على قهوه وقولت اطلب شاى واحد شاى يا واد يا حسن)القهوجى) ايووووه جاى ولسه بشرب الشاى ولقيته ماسخ انت ياواد يا حسن الشاى نا قص سكر طيب يا باشا هجيبيلك سكر (باشا اهوه فى واحد بيقدرنى ولسه بحط السكر ولقيت رمل فى السكر زعقت للواد حسن وطلعت غلبى فيه انت ياواد بتغش السكر انت ياواد بتبيع الشاى وتخصخصه انت ياواد بتزور فى الشاى الخ الخ راح الواد بصلى وقال الحقوا بيعيب فى النظام الحقوا ده سياسى بيتكلم فى السياسه مش عاجبه السكر اللى بتصنعه الدوله وبيقول عليهم كلام والواد حسن كان هيلبسنى قضيه حلفت من ساعتها لا احب الشاى ولا هوه يحبنى تمام سلام